بەپێی هەواڵی کوردپرێس، ئایەتۆڵڵا عەلی خامنەیی، ڕێبەری باڵای کۆماری ئیسلامیی ئێران لە رێورەسمێكدا كە لە حوسێنییەی ئیمام خومەینی لە تاران، بۆ یادی یەکەمین ساڵڕۆژی شەهید بوونی ئیبراهیم رەئیسی، سەرۆک کۆماری پێشووی ئێران رێكخرا، ڕایگەیاند: دانوستانی ناڕاستەوخۆ لە سەردەمی شەهید ڕەئیسیدا هەبووە، وەک ئێستا، بەڵام هیچ ئەنجامێکی لێ نەکەوتەوە، ئەمڕۆش پێمان وانییە ئەنجامێکی لێبکەوێتەوە.

ئایەتۆڵڵا خامنەیی ڕاشیگەیاند: بەو پێیەی باسی دانوستان دەکەین، حەز دەکەم هۆشدارییەک بدەم بە لایەنی بەرامبەر، لایەنی ئەمریکی کە بەشداری ئەم دانوستانە ناڕاستەوخۆیانە دەکات و قسە دەکات، پێویستە خۆیان لە لێدوانی پووچ و بێمانا بەدوور بگرن.

ڕێبەری باڵای شۆڕش ڕاشیگەیاند: ئەگەر بڵێین رێگە نادەین بە ئێران یۆرانیۆم بپیتێنێت، ئەوە دەستدرێژییێكی قبووڵنەکراوە، هیچ کەس چاوەڕێی مۆڵەت لەم لایەنە و ئەو لایەنە ناکات، کۆماری ئیسلامی سیاسەتی تایبەتی خۆی هەیە، شێوازی خۆی هەیەو بەردەوام دەبێت لە جێبەجێکردنی.